بسم الله الرحمن الرحيم
في طريق العودة من المدارس وأنا برفقة إبننا (Bin Yang the 1st) وإبنتنا ذات الستة أعوام والنيف (لولو) دار بيننا الحديث الآتي :
إبني: شخبار الإنتخابات ؟
أنا: للحين ما نزل المرسوم ..
إبني: إنزين ما عرفتي منو الأربعة اللي بتنتخبينهم للحين ؟
أنا: لا والله يما أنا للحين مو لاقية واحد هالنوب 4!!!
إبني: فلان ليش ما تنتخبينه؟
أنا: والله يما أحترمه وأحترم دوره السابق بس ما كان يؤدي بالفترة اللي فاتت وأدري إنه ما يبي ينزل بس ما عندهم غيره ...
إبني: إنزين ليش ...
إبنتي لولو مقاطعة: ماما ... حفلتنا اليوم حلوة وفي بعد واحدة باجر ...
إبني : لولو ما تشوفيني قاعد أكلم ماما ؟
أنا: يا كثر حفلاتكم .. لحظة .. يا ماما يا لولو عيب تقاطعين أخوج ولا اللي أكبر منج وهم يتكلمون نطريهم يخلصون وقولي اللي عندج .
لولو : حاضر ماما ... أوكي "بصوت عالي يعني أنا مطيعة "
إبني: زين فلان؟
أنا: هم خوش إنسان بس ماله حس ولا صوت ولا سوى شي يذكر .. ويا يما الحياوي كلش ما يمشي بهالمجلس ...
إبني: زين فلان؟
أنا: في إحتمال أعطيه ...
إبني: وفلان؟
أنا: يديد عالساحة ولا سمعت عن برنامجه الإنتخابي ولا كان له صوت أو دور سياسي من سقط الإنتخابات اللي طافت ..
إبني: يقولون فلانة بتنزل كمرشحة هالإنتخابات ... ما بتعطينها صوتج؟
أنا: من صج؟ عندها مقر؟
إبني: للحين لا ..
أنا : عندك معلومات عن برنامجها الإنتخابي؟
إبني: للحين لا ..
أنا: إنزين على أي أساس أنتخبها؟
إبني: ما أدري بس لها دور إجتماعي وديني فعال .... واسمها معروف بأوساطنا
أنا: حبيبي .. لو قاعدين بمسجد ولا مبرة ولا حوزة راح تكون هي أول واحدة أعطيها صوتي ... بس يا يما هذه إنتخابات مجلس الأمة مو مجلس الشريعة !!!!!!!!!
إبني: إي يما صاجة ...
لحيظة "تصغير لحظة" من الصمت تمر ...
لولو: ماما أقدر أتكلم الحين ؟
أنا : قولي يما شفيها حفلتكم؟
لولو: كانت حلوة وااااايد ... والأبلة تقولج غسلوا نفنوفي مال علم الكويت عشان باجر في بعد حفلة ..
أنا : غير عن حفلة اليوم؟
لولو: إييي غييير ... "وهي ترفع عيونها جنها تقول شفيها أمي ما تعرف"
أنا: وغير عن حفلة الأسبوع اللي طاف؟
لولو: إيي هذيج قديمة صارت وخلصنا منها ..
أنا: لولو حبيبتي أنتوا كل أسبوع عندكم حفلة ؟؟
لولو: ماما لازم نسوي حفلة عشان تحبنا الناظرة ... ومرات نسوي ذا سيم حفلة اثنين مرات .." بدلياتها عجيبة"
أنا: حق شنو حفلة باجر ؟
لولو: شي ..
أنا: شي شنو؟
لولو: شي حق رقصة الشعبية ( الترجمة = فن الرقص الشعبي) "وهم فرت عيونها "
أنا أتمتم تحت أنفاسي: لو يغيرون إسم مدرستكم ولا الوزارة بكبرها وتصير "كاباريه ومرقص هز الوسط والتلقين مو أحسن"!!
إبني يضحك : صاجة يما ...
أنا: أشوف لين بغيتوا تسمعون... حتى الهمسة تسمعونها !!
إبني: هلا يما؟ شقلتي؟
