ســـــــــوبـــــر سكـــــــــــــــــــــــوب ...........

بسم الله الرحمن الرحيم

طبعا قناة سكوب أنا ما أتابعها ولا أحبها ولكن مرات أشوفها لما أعرف بوجود مقابلة مع أشخاص سياسيين, إعلاميين أو رياضيين أهتم بسماع أرائهم حتى لو كنت أختلف معهم.

والشباب أصلا مومقصرين فيهم, ولكن بصراحة طفح الكيل من هالقناة ولازم تعرف مستواها !!!

أول شي سالفة دعاية الشعار اللي يطير في الكويت على موسيقى فيلم سوبرمان ما كنت فاهم المغزى !!

وبعد عدة مقابلات عرفت واكتشفت إنهم نصبوا أنفسهم كقناة خارقة
(Super Scope)
للدفاع عن الحكومة والحكوميين وكل ما يمت لهم بصلة ........!!!!!!

هذي مقدمة لشرح قصة التصميم الذي قامت بتصميمه مشكورة زوجتي العزيزة Yin :)

ثانيا: وين المصداقية والحوار الحر اللي قاعدين يعلنون عنه إذا محد مسموح له يتكلم بصراحة أو ينقد ولو بطريقة بناءة أي شي حكومي؟؟
ما تسوى على الوشيحي كلمته عن رئيس الحكومة يوم نط بويهه الفضلي وقال له رجاءًا المحمد خط أحمر !!!!! يا للعجب ... وين الحرية وين الشفافية وين عماة العين, ومع عدم إتفاقي مع الوشيحي بمعظم اطروحاته, ولكن برأيي البسيط, هو أفضل مقدم برامج حالي, وأستمتع لما أشوفه يقابل احد ................ بعكس دمى سكوب.

ثالثا: عيزت وأنا أحاول أدق على هالقناة لأسأل سؤال مشروع كمواطن ... في جم مقابلة للقلاف حاولت أتصل من بداية الحلقة إلى أن انتهت بدون أي فايدة (مو السيد خط أحمر) .. وحلقات أخرى .. وتكرر الأمر بالأمس كذلك :-(
يا أخي قولوا لنا نبي تبرعات للقناة لأن هذا الغرض الوحيد من عرض خدمة الإشتراك بالبرنامج ...... تدز مسج يردون يسألونك شنو سؤالك !؟!؟ تدز سؤالك وسلامتك!!! وترد تحاول لأنك وبشدة تبي تسأل أسئلتك ....... حاول مرة أخرى..
خو قولوا من الأول محنا داقين عليك وحامض على بوزك تسأل سؤالك, ولكن البوق شلون صاير؟؟؟

وكل مرة ينصادون بسوالفهم الخايسة ( فيها ريحة ) مثل أمس داقين على راشد بديح, وأول ما تكلم جان يقول ترى أنا مادري شنو موضوعكم يا جماعة ( داقين عليه فجأة المسكين :), طيب بدل ما تدقون على الناس اللي تطبل لكم, أخذوا اتصالات الناس اللي دازين لكم مسجات ودافعين فلوس عشان يشاركون !!!

ويايبين الكابتن الكبير ثامر عناد يحلل؟ّ؟ّ؟ّ؟ّ؟ّ؟, هذا مستواه أرقى يا جماعه, للي ما يعرفه فهو مدرب نادي الصليبخات لكرة القدم ( الفريق الأول ), وملعب بالفريق الأول 7 من اخوانه وعيال اخوانه أساسيين, بالإضافة إلى كرة اليد وغيره وغيره, يعني الزبدة النادي نادي ابوه, ويعيب على محمد ابراهيم يايب 11 لاعب من القادسية, على الأقل ما يصيرون له يالطيب. .... مع إني لا أوافق أبو نواف بتشكيلته المفروضة عليه, لأن ابيه مرة بحياته يكون له راي بتشكيلته.

رابعا وخامسا وسادسا شخلي وشقول .... أعتقد الأخ enter_q8 مو مقصر وهو المرجع السكوبي للمدونين .. مع إني ما أتفق مع كل ما يطرحه الأخ العزيز إلا إنني أحترم رأيه وشخصه ... وأرد أقول هو الخبير الفني السكوبي :)

ملاحظة :
حلقة أمس ما كان في داعي لناصر العنزي إنه يقول حق المتصل فهد السلامة إنت لين لعبت كرة قدم تعال انتقد كرة القدم !! شهالأسلوب ومن صحافي رياضي ... السلامة لاعب كرة سلة سابق وكان يلعب قدم يعني رياضي محترف قام بتمثيل الكويت .. ويغار عليها ويبي مصلحتها حاله حالك وأنت صحفي ليش لك حق وهو ماله حق ينتقد!! كلنا ننتقد أليس بالأحرى برياضي محترف أن يكون له حق الإنتقاد.....


على الهامش
والله طلعوا أخوانا السعوديين شماتة مثلنا إذا مو أخس منا :)
ترى هالكاريكاتير دازينه لنا الأهل من السعودية مع التعليق اللي تحته

إرتفاع أسعار المحللين الرياضيين

شروط المحللين :
1- بدل إهانة مقدم
2- يحلل وهو متلثم
3- قطع الإتصالات الخارجية منعاً للإحراج
4- يجب أن يكون متربي على أسس علمية مدروسة

وسلامتكم
وفي أمان الله