Friday, September 4, 2009

العزاء في بلدية الكويت ؟!؟!؟!؟


محادثة بيني وبين زميلي بالعمل:

زميلي: يانغ ترى فلان عمه توفى.

يانغ: لا إله إلا الله, إنا لله وإنا إليه راجعون, وين عزاهم ؟

زميلي: العزا ببلدية الكويت.

يانغ: ها ؟ قصدك ببيته يم مكتب البلدية ؟

زميلي: لا, لا بمكتب البلدية من بعد صلاة العشاء إلى 12 منتصف الليل.

يانغ: مخي قام يودي ويجيب, ماني فاهم ؟!؟!؟!؟!؟ مكتب البلدية مسكر بالليل وما فيه موظفين وزميلنا المتوفي عمه ماله شغل أصلا بالبلدية.
سألته: فهمني اكثر الله يخليك ترى مو فاهم ؟؟؟؟؟

زميلي: يا حبيبي مع إنو بتقولوا عنا وافدين بس شوف الوافدين بيعملوا ايه, حتى لو كنت عاوزني أعمله في المخفر حعمله ( وهو يضحك ).

والله انا ما صدقت, قلت إلا أروح العزا, ورحت وإلا صج مبطلين مركز البلدية على حسابهم وماخذين أكبر مكتب وصافين ياخذون العزا بعمهم.

انتهت


أترك لكم التعليق !!!!!





آخر خبر :

باركوا لمدامنا الموقرة المصونة "ين" إنضمامها لشلة المسَرّحين "كولولولولووووووووووش"
وذلك لخسارة الشركة الطبية الكبيرة والعريقة التي كانت تعمل بها وإبلاغ جميع الموظفين "كلهم" بعدم الحاجة إليهم بعد أن قاموا بفلّ الشركة وإرسال خطاب للتأمينات الإجتماعية مع بداية الشهر .. ولم يقوموا بتسلميهم معاشاتهم للشهرالذي مضى واعتبروها عيدية لهم !! ( مطرح ما يسري يهري..... إن شاءالله)
وكان الكلام شفهيا وبالحرف الواحد: "صلوح ملوح واللي يدل بيته يروح "
كولولولولوووووووووووووش

سيتم فتح صندوق للتبرعات بالمدونة ويرجى التبرع بالدولار الأمريكي
:))

41 comments:

maha said...

شي

سالفة البلدية


وموشي

سالفة ين

موخوش سالفة

dr-maarafi said...

صج لا تعليق
ليش ما في اماكن و لا شنو ؟؟

الله جنك شمات بالمسرحين و الشركة:-)

أتيت متاخرة said...

واعليه عليج يا ين كدرني الخبر
بس ما تدرين صلاح لج ان شاء الله شوي ترتاحين في البيت وانتي متنسيه وتعبانه
وان شاء الله ما تولدين بالسلامة الا محصلة لج شغل زين
ترى الياهل بركة
وربي بيبدلج بشغل احسن منه


العزا بالبلدية !!!!!!!!! شلون يعني مكتب حكومي يفتح في غير اوقات الدوام الرسمي !!!!! والله بعد في هالزمن كل شي جايز

chandal/danchal!! said...

ما فهمت ليش مسوينه بالبلدية!... اسمحلي مع الصيام وعدم شرب "حليب كرك" المخ لك عليه!
.
.
.

لا حول ولا قوة الا بالله... الله يعوضها خير عن عملها السابق ويوفقها بوظيفة افضل

Safeed said...

مرة خالة مدرس توفت، 3 أيام كان العزا بمكتب الوكيل
:)
متعوده دايما

=============

لا حول و لا قوة إلا بالله العلي العظيم
.. مو خوش خبر
الله يعوضكم خير إن شاء الله، و الخيرة فيما كتبه الله
و بحق المولود في هذه الليلة بإذن الله تفرج

ميمة السبيت said...

** لا كلش مو وقته وراها ولاده و لويه
الله يعينها كلش مو خوووش خبر والله

علي الملا said...

هههه يصير نتبرع بالتومان ؟؟

يلا ان شاء الله الخيرة فيما اختاره الله :) والله يرزقها ما هو خير بحق هذه الليلة المباركة ولادة الزكي عليه السلام

مطعم باكه said...

افا .. ما تستاهل مدام ين

الله يعوضها بوظيفة أحسن منها ان شاء الله ..

بخصوص موضوع البلدية .. المفروض تتصل بالشرطة وتقول لهم اكو حرامية يبوقون مبنى البلدية !!

مركبنا said...

يه يه يه

شو هل خبرية

المدام سرحوها !

الظاهر انك مقصر ما طلعها وايد
والداوم حب ياخذ يخاطرها ويسرحها

=======

اما عن الوافدين
الديرة اخذت بقانون الغابه والى تقدر تاخذه اخذه بذراعك !
ولا احد راح يكلمك
والوافدين اعرفوا سر الطبخة

أبو الدســتور said...

لاوالله
وليش ماقلت لنا نروح وياك
عندي معاملة واقفة

Yin مدام said...

أخوتي وأخواتي الأعزاء

أشكر لكم تعاطفكم معي وعسى ربي يعطيكم أكثر من اللي طلبتوه لي إن شاءالله


أخذوا الخبر بروح مرحة .. والله ..يعني غيري أحسن مني ولا شنو ؟؟
وبعدين كل شي بهالبلد فوضى وقفت على الخاص والشركات
الضحكة محد درى الشركة فلت وبتسكر إلا آخر يومين دوام
وتخيلوا موظفين شركة كاملة مو واحد ولا أثنين !!
والشركة الآن مقفلة ومهجورة

شر البلية ما يضحك
@@



ترى أنا بألف خير نفسيا ومعنويا وكل شيء تمام
الحمدلله رب العالمين
عل كل حال
وإذا تسكر باب ربنا بيفتح باب أحسن وأفضل وأوسع منه

وشوفوا كاهي الإبتسامة
:))))))))))))))))))))))))

Yang said...

maha:

عادي كلنا لها

ومن حبنا لها نوفر لها

:)


تحياتي

Yang said...

dr-maarafi:

لا وانت الصاج في اماكن وايد, بس هذيل مالكين البلد.

وبالنسبة للشماتة :)

الشماته مو على المسرحين, الشماته على الحكومة اللي مهي عارفه شلون تحميهم.


تحياتي

Yang said...

أتيت متاخرة:

بالنسبة للتسريح
انا اعتبرها خيرة مثل ما قلتي, والحمد لله على كل حال.

والعزا بالبلدية, فهذا صار شي طبيعي وصدقيني يا اختي مثل ما قالي زميلي, يقدر يسوي العزا حتى بالمخفر
فوضة :(


تحياتي

Yang said...

chandal/danchal:

ليش مسوينه بالبلدية, اقولك يا محفوظة السلامة:
لان ما عندهم مكان يسوون العزا وشقة الريال صغيرة, فسووا العزا في مركز حكومي.

يعني حتى المراكز والمباني الحكومية صارت تحت تصرفهم :(


تحياتي

Yang said...

Safeed:

هلا والله بالنور

صدقني انا قتلها من اول ما سمعت الخبر, بأن هذا شهر الكرم والخير
ولابد في شي ناطرها أفضل.

وحتى لو مافي شي, اللهم لك الحمد :)


تحياتي

Yang said...

ميمة السبيت:

انشاء الله خيره, خل ترتاح بالبيت احسن :)


تحياتي

Yang said...

علي الملا:

شكله زايد عندك كم تومان من الزيارة اللي طافت تبي تفتك منهم :)

انا ما اقبل الا بالدولار مع اني قتلها خل نخلي التبرع بالين الياباني بس ما رضت :(


تحياتي

Yang said...

مطعم باكه:

ههههههه, تصدق عاد راحت علي هالفكرة :(

المرة الياية انشاء الله.


تحياتي

Yang said...

مركبنا:

صح لسانك

:)


تحياتي

Yang said...

أبو الدســتور:

تامر طال عمرك, صاحبي يمشي الواقف ويوقف الماشي :)

خل اكلمه يسويلك واسطة :))


تحياتي

Enter-Q8 said...

الديرة ديرتهم طال عمرك
تكفى اذا تمون عليه
يقدر الاخ يضبطني بالمتحف العلمي حق القرقيعان

فريج سعود said...

والله الميت الي بيبتلش بيه ثواب الفاتحة من البلدية !!!ء

قدم تعازينا التسريحية للمدام ين

وقول لها اذا معزمة على الاعمال الحرة ترى مكينة السنجر عليّ

Yang said...

Enter-Q8:

لووووووووووووووووووول

شمعنى المتحف العلمي ؟

بس هم حاضرين طال عمرك :)


تحياتي

Yang said...

فريج سعود:

اي والله اي والله اي والله

شكلي بدزلك ايميل عن قريب اطلب المكينة :)


تحياتي

aL-NooR . said...

خلص العزا ..لا حول ولا قوة الا بالله


***************
و على المدام ..دزلنا رقم الحساب ..و ابشر بالخردة .. احساسي ان راح يصير الحال زي بعضو ..
الله يعوضها خير ان شاء الله

***************************

Yang said...

aL-NooR:

الله يستر عليكم من من التسريح, مو خوش شعور :)

الله يسهل على الجميع, وعلى فكرة انا حاط حصالة الجمل مالت البنك الوطني عند الباب :))


تحياتي

Manal said...

السلام عليكم جميعا من مدينة الضباب بعد اللقاء الي جمعنا والفرحة الي مش سيعانا بلقياكم

___الله لا يحمنا منكم_____________


بالنسبة للخبرين او الموضوعين فشر البلية ما يضحك

الله يعاد الجميع على الي نشوفة بهالديرة وهالزمن

:)

بس ما عليه
بالنسبة للعيدية
فاحنا عيديتنا بالباوند
حولوها كويتي ترا فكرة حلوة
:)

Yang said...

Manal:

اولا الحمد لله على سلامتكم, ولقاءكم مع زوجكم الدختر كان جدا ممتع, وانشاء الله اليايات اكثر :)

بس شكل الصيام في انجولترا صعب عليكم, اشوف البدليات مالها والي :)

سلميلنا على المؤمن الصالح بو شعر مسبسب كثير السلام وخل يسمحلنا على التقصير :(

ولايفكر يكلم ولدي مرة ثانية, طلع مخرب, انا حسبالي فقير :)


تحياتي الكثيرة لكم ولا تنسونا من دعائكم ولا بأس بالبوند, من المستحبات :)

Dakhtar Blue said...

البلدية من زمان غاسلين إيدنا منها

وللمدام نقول لها ما عليه
وعسى أن تكرهوا شيئا وهو خير لكم
يمكن خيره

لكن أنا داش علشان أقول لك يالعزيز يانغ

إني قاعد اكتبلك هالتعليق وانا قاعد على بلكونة شقتنا عالبحر
ونسيم الأمواج يداعب شعيرات رموشي

شلون الرطوبة والحر عندكم؟

:-P

تحياتي


ولا تحرني بقعدتك بالكويت برمضان مرة ثانية

ترا المرة الياية أطرشلك صور خصيلات شعر حواجبي بينما يداعبها عليل الجبال اللي ورانا

Salah said...

افا والله افا

الله يرزقها بوظيفة أحسن ان شاء الله

وبسك تحرش :)

Yang said...

Dakhtar Blue:

رمضان كريم وعجيب بالكويت :)

تمسك على الاربع الفجر, تنام وتقعد عند الثانية ظهرا, بعدها تدق سلف تروح سوق المباركية يا ولد الحجية, تتمشى وتتشرى أغراضك وترجع على الخامسة والنصف, وتفطر عند السادسة.
اللهم ادمها نعمة :)

ما ينفعك بحرك وبطنك تطحن من الجوع :)

خعخعخعخعخع :)

انشاء الله ترجع لنا سالم دختر وغانم, ونشوف شراح تسوي بالحر والرطوبة بعد 7 سنوات على البحر :))


تحياتي

Yang said...

Salah:

مي يتحرش ؟!؟!؟!؟

استغفر الله :)

قول حق ام مهدي شكرا على القهوة, صراحة قهوة انما ايه :))


تحياتي لك ولام القهوة والورعان جميعا :)

Salah said...

بالعافية طال عمرك

حاولت جاهدا اني أقنعها تكشت فيكم وتييب القهوة وياها ولكن ما قامت تسمع كلامي

الله كريم

Yang said...

بو مهدي:

الحال من بعضه, لازم نغير الخطة إلى 3-5-2

بلان بي :)


لاتفتن علي :))


تحياتي

|:| DUBAI |:| said...

السلام عليكم جميعا

أخوي أنا سامعة بعرس
في نادي رياضي
بس عزاء في بلدية
هاي يديدة خخخخخ

وي وي وي شو هالخبر
اللي يضيق الخاطر
يعني أختنا بطالية؟
يان .. الله يعينج
بس خذيها فترة نقاهة
و دوري مكان يديد
و عسى أن تكرهوا شيء و هو خير لكم

: )

و عيدكم مبارك مقدما

حسافتج يا كويت said...

دام هذي حكومتنا كل شي معقووول

باجر نشوف عرس بالشؤون وغبقة بالمواصلات

فــــــرنـــــــاس said...

كل عام وأنت بخير

فرناس

Safeed said...

سلام عليكم يا أهل الدار

عيدكـم مبارك، و كل عام و أنتم أجمعين بخير و عافية إن شاء الله

ميمة السبيت said...

** عيدكم مبارك و كل عام و انتوا بخير

JiBLa CiTY said...

المفروض انت اول واحد يفرح لتسريح المدام لأنها بتداوم بالبيت
وتستاهل الراتب منك



ماقول الا الله يعز الحكومة
:P