حدث في مطار الكويت 28-08-2008

بسم الله الرحمن الرحيم

اليوم الصبح وأنا في المطار, صار لي موقف حرق قلبي, وقمت أنفض من كثر ما أنا متنرفزة ومعصبة, شقاعد يصير ببلدنا هالأيام!!
أول ما دشيت البيت فتحت اللاب توب وبلشت أكتب, كل الكلام إللي كنت أقوله بيني وبين نفسي. وصلت نص الصفحة وقفت
ورديت قريت إللي كتبته, كان كلامي منفعل وكله هجوم. صحيح كان قوي ومن أقوى ما كتبت. وعجبتني الصياغه."جني بأرد أسوي له بوست" :)

بس ما عجبتني رسالته وطريقة توجيهها, ما عجبتني اللغة, ما عجبتني نفسي وأنا معصبة ومحترة ويائسة.

تذكرت مقولة قاريتها من زمان
لا تتكلم وأنت غاضب وإلا ستقول أجمل كلام ستندم عليه بقية حياتك.
قمت مسحت إللي كتبته و طفيت الكمبيوتر .
سولفت مع ولدي عن الرحلة وشنو إعجبه وشنو إستفاد وأكملت يومي مع أبنائي وزوجي. رحت زرت أختي. وتناقشت بالموضوع مع الكل
ولما حسيت إني هديت. فتحت اللاب توب مرة ثانية وكاني قاعدة أكتب لنفسي ولكم إللي صار.


رحت الصبح أستقبل ولدي من السفر. (وصل بالسلامة وقرت عيني. بويه نبيي) ويعل الله يحفظ عيال الحاضرين والغايبين

المهم وصلت إمبجر " ما أدري شكو" بس صار له 16 يوم بعيد" إشتقنا".

يوم دشيت المطار دورت على لوحة الإعلانات ولا الطيارة عليها تأخير. قلت أروح أشرب لي قهوة من كاريبو لأني ما أشرب من ستاربكس" مقاطعة"!!

قبل لا أدش شفت مكتبة السواني







فكرت أشتري لي كتاب أتسلى فيه لين يوصل

ماكو إلا رف واحد كتب أجنبية والله يزيدها من إختيارات. أدور كتاب رواية.. أي شي. المهم طاحت عيني على كلمة







قلت خوش رواية ولا ماميش. سحبت الكتاب ولا @@




وللي مو قادر يشوف عدل
مكتوب " A noval of Israel Today"
الترجمة " رواية عن إسرائيل اليوم "

قلت همم أنا بعاند نفسي وأقول هذي رواية عن سوء الأوضاع في فلسطين ولا عن جرائم إسرائيل. قمت قلبت الكتاب أشوف نبذة عن الرواية

وهذي ترجمة بسيطة وسريعة " ريسا ميللر تكتب عن المستوطنين الإسرائيليين لتبين إنسانيتهم وصراعهم مع الكمال وإعتقاداتهم الخالصة والحقيقية تجاه حقوقهم التاريخية والتراثية لبقعة صغيرة من أرضهم المقدسة.. وهي قصة تحكي عن عوائل أمريكية يهودية هاجرت لتستقر في موطنها وعن معاناتهم والجرائم التي يشهدونها ...وإلخ إلخ إلى أن يقول الصحفي أنه ينتقد عدم ذكر أو شرح الجانب الآخر لمعاناة العرب من المستوطنين من جانب السيدة ميللر".
أوكي هذي الرواية بمكتباتنا!! عن مثالية إسرائيل, ليست رواية تاريخية. ليست قصة سياسية ذات جانبين. إنما رواية تروج حق وجود إسرائيل وتبرز مستوطنيها كضحايا!!!!

وين وزارة الإعلام عنكم؟ وين الرقابة؟ وين لسانهم إللي شطوله علينا ليه لقوا كتاب إسمه مو عاجبهم ولا الصورة إللي عليه مو عاجبتهم بغض النظر عن المحتوى؟!؟! وتوهم ساحبين كتاب صار له 10 سنين ينباع وفجأة وبدون ذكر أسباب. الله يستر!
رحت بتكلم مع إللي موجود بالمكتبة, ولا موظف من الهند لا عليه ولا له شغل... قلت وين أروح من أكلم. أخاف أحوس أدور على شخص مسئول ولدي يطلع من البوابة ما يلاقيني

شريت لي Mocha ورحت عند البوابة أنطر..وأفكر بالموضوع. شوي ولا أشوف ولدي وبعدين تسكر الباب...الحين يطلع . شوي ويطلع.. خذا له بو 10 دقايق عند الباب
يوم وصل وبعد السلام الحار قلت يما شفيك طولت

قال لي هذا مفتش الجمارك قاعد يسألني أسئلة مالها داعي ومو عاجبه هذا مختصر شديد للأسئلة!
الجمرك1: أنت إيراني؟
إبني: شنو؟ ليش شكلي إيراني؟
الجمرك1: لا بس شدراني خو مو مكتوب على يبهتك!
أسئلة جمركية عادية وبعدين
الجمرك 2: هل أنت شيعي؟
شنو المعني والمغزى ورا هالسؤال عند باب الوصول؟
ترى في كتاب عن The Israeali Holly Land بمكتبة يم هالباب
ترى في نا س تهرب الحرام من هالباب
و في ناس تبوق وتنحاش من هالباب
و في ناس تكفر وتفجر داشة وطالعة من هالباب
وفي ناس تفرق ونبيها تذلف من هالباب
وأنا ولدي يسألونه هل أنت شيعي ....قبل لا يدش من هالباب!!

سامحوني على الطوالة
ومابي أكتب أكثر, لا أرجع إلى حالة الغضب والحزن إللي كنت فيها
وما أقول إلا
الله يستر على هالبلد
وعلينا


والسلام