بسم الله الرحمن الرحيم
كنت بنزل بوست أمس بس إحترق ..لأن في شخص سبقني فيه :(
فقررت أحكي لكم حكاية من حياتنا.
المكان: شقتنا بفانكوفر- كندا
الموقع:على ضفاف نهر يفصل ما بيننا وبين الجبال الرائعة ..
كل صورنا احنا موجودين فيها .. فحطيت لكم هذي "مصدرها حجي جوجل"
الزمن: 12:30 من صباح أحد أيام 2001
ليلتها كنت أتابع فيلم شيق في ظلمة الليل وحدي.. وكانوا يانغ والأولاد نايمين.. الجو كان جداً بديع "كعادة فانكوفر" فقررت ترك باب البلكونة مفتوحا .....
مسوية جو ومطفية الليتات .. ومندمجة بالفيلم ........ ولا ألمح حركة بطرف عيني .. التفت صوب الحركة وما شفت شي .. قلت لنفسي يمكن ظلال الفيلم من التلفزيون ...
رديت أطالع الفيلم ... ولا أسمع صوت حفيف على رفرفة أجنحة ... وطيت صوت التلفزيون ... وقمت أتبع الصوت ..
أحس بشي يطير بس ما أشوفه ... شغلت الليت ولا طير عود يخطف فوق راسي ..
قلت حق نفسي "من وين دخل هالطير؟ ولين الحين شلون أطلعه من الشقة .... ماكو إلا خبير الطيور" فقررت إني أقعد زوجي العزيزمن النوم... دشيت الدار شوي شوي .. ووقفت على راسه ..
قعدته بصوت واطي وبحنية :)) : يانغ ... يانغ حبيبي
ما قعد
أنا: يانغ ....يانغ !! ماكو فايدة قمت عليت صوتي : يانغ حبيبي ؟
يانغ: همم ... شنو " والنوم للحين بعينه"
أنا: قوم بقولك شي !!
يانغ: وإنتي ما تحلى سوالفج إلا تالي الليل !!خليني أنام والصبح سولفي على كيفج .
أنا: قوووووم في شي بالشقة !!
يانغ: شي شنو ؟ لا تقولين لي شي خربان وتبيني أصلحه هالحزة !! خير؟
أنا: في طير عود وغريب قاعد يطير بالشقة!!
يانغ: مقعدتني على" طير" ؟ خو طفي الليتات .. الطيور ما تشوف وتدعم بالظلمة ... وفتحي البلكونة وراح يطير ويطلع منها...
أنا: يعني..؟ بس الليتات كانت طافية شلون دش؟ ..
يانغ: شدراني شلون دش!! إنتي بس طفي الليتات ويطلع ... ورد حط راسه ونام!
أنا: أوكي ... رحت طفيت الليتات وقعدت بالصالة .. وووووووووووووووووووششش ولا طاير بيني وبين شاشة التلفزيون !! طالعت عدل ولا جنحانة وايد عودة وجسمه عليه شعر وماله منقار !! وراسه كلش مو راس طير!!
قلت لنفسي: يا ربي هذا جنه خفاش!!!!!!!!!!!!!!!!!!!!!!
ووووووووووووووشششششششششش طار أقرب مني وشفته عدل !!!!!!!!!!!
طلع خفاش ونص !!!!!!!!!!!
ركضت بسرعة البرق للدار
أنا: يانغ قوم قوم قوم ........... قوووووووووووووم بسرعة !!!!!!!
يانغ: شنو... شصاير بسم الله !!!
أنا : الطير شكله مو طير !!!
يانغ: هه؟!؟
أنا: اقولك الطير... طلع خفاش !!!!
يانغ: خفاش؟؟ خفاش ؟؟ بالله من وين بيطلع لنا خفاش؟ إنتي لو تبطلين أفلامج الخيالية وأفلام الرعب تصيرين خوش مرة!!
أنا: أقولك خفاش تقولي أفلامج وخرافاتج !! قوم صيده !!
يانغ : إنتي ما راح تخليني أنام لين يطلع هالطير ..
أنا : أقولك خفاش تقول لي بتنام ..... يالله قووووم !!!
يقوم يانغ وهو يتحلطم " من وين طلع لي هالطير هذا بالله .. لا وتقولي خفاش ..زين ما تقولي دراكولا "
أنا: خفاش .......... مو طيرولا دراكولا :((
يطلع يانغ ويتمشى على الراحة وأنا وراه .. ما شفنا شي لين وصلنا الصالة .. سمعت صوت قريب من باب الشقة قلت له جرب صوب الباب وأنا بشوف باجي الشقة .. راح يانغ وقام يطفي الليتات ويشغلها ويبحث عن الطير/الخفاش...
وصلت الممر اللي بين غرف النوم .. ولا هاللي يايني ووجهه مخطوف ..........
يانغ: أقول !! ............. هذا خفاش !!!
أنا : صج ...؟ والله...؟ وأنا صار لي ساعة شقاعدة أقولك .............. شلون الحين ؟
يانغ: ما أدري...... إنتي شرايج؟
أنا: تصيده!!!
يانغ: بالله أنا شدراني شلون يصيدون خفافيش!!!
أنا: إمسكه .. طقه !! ولا خرعه بعصاية المخمة لين يطلع من الشقة!!
يانغ: همم ....... شوفي إنتي مسكي العصاية وأنا أخرعه وأخليه يطير صوبج ولين وصل طقيه..!!!!!!!!
أنا: يا سلام على الخطة!!......... بالله عضني؟
وفي خضم النقاش ولا هالخفاش طاير فوق راسنا وسِيده على دار اليهال !!!!!!!!!!!!!!!!!!!
أنا قمت أصارخ: دش دار اليهال .. دش دار اليهال.. دش دار اليهال !!
واركض جني مينونة وادش دار اليهال وأغطيهم من راسهم لين ريولهم ... وأسحب لي شرشف من الكبت المبطل وأقعد أهش الخفاش ..
ناقزة مني .. وناطة مني.. وهاشة مني .. وألقى مضرب البيسبول الفلين الخاص بـ" بن يانغ الأول" وأشيله .. واوقف شرشف بيد والمضرب بيد والشعر منكوش من المناقز... واقفة وقفة استعداد للهجوم والدفاع !!
طار يمي وارقعه بالمضرب بس ما حشته... جربت مرة ثانية وبوشت .. وهشيته بالشرشف الهشة الأخيرة وطار برة غرفة اليهال ... ركضت وراه بسرعة وسكرت الباب !!
أتلفت يمين ويسار أدور على زوجي العزيز المقدام " يانغ" ما أشوفه !! ناديته : يانغ ؟؟
ولا يتبطل باب دارنا شوي شوي ... ويطل رأس زوجي العزيز من وراه ويقول لي بهمس: صدتيه ؟
أنا أيضاً بهمس: لا !! ........ بس أنت شتسوي بالدار؟
يانغ : خفاش وطاير صوبي شتبين أسوي له أوقف وأمد له رقبتي ؟؟
أنا: لااا ............ تدش الدار وتخليني بروحي !!
يانغ : مو يقولون الأم تصير أقوى من 10 رياييل إذا صاروا عيالها بخطر ؟؟ حسيت فيج متحكمة بالوضع !!!!
أنا: أقول هاك ........... عطيته الشرشف والمضرب ......... وقلت له : دوري خلص واليهال بخير ..... روح شوف شغلك !!
يانغ : أووف ..... عطيني إياهم وأمري على الله .......
أخذ يانغ عدة الحرب ولحق بالخفاش ......... وطبعا ما قدرت أوقف بمكاني وأخلي زوجي حبيبي ونور عيني بروحه :))
لحقته لأشهد معركته مع الوحش الطائر وأشجعه ....
بدا يانغ يهشه من بعيد لبعيد لين حكره عند مدخل الشقة ... وقام لف الشرشف وقعد يضرب الخفاش "طبعا الخفاش ما يشوف ويعتمد على الصوت " فكان أسرع من يانغ ويتحاشى كل ضربة .........
للحين أنا بس واقفة وأتابع إلى أن وقف الخفاش على ظهر يانغ وهو ينحني ليلتقط الشرشف بعد ما طاح من يده ..
شهقت : ياااااانغ وقف على ظهرك ... على ظهرك ... دير بالك !!!!!!!!!!
قام يانغ يناقز..... ويهش يمين ويسار وفوق راسه .. والخفاش يطير يمين ويسار ... ويانغ يلعن ويهش ويدور على نفسه ..وما أسمع إلا : وقف الله يلعنك من خفاش !!
هنا بدأت أضحك " ما أنلام شكله يضحك"
يانغ يتصارع
وأنا أضحك لووووووووووووووووول
أنا أضحك ......... والخفاش يتحاشى ويطير .. .. هني حس يانغ إن أنا والخفاش نضحك عليه !!! خزني من طرف عينه ورد للخفاش ...
عصب ريلي .. وحمى الوطيس .............. تغيرت وقفة يانغ وصار يضرب بسيفه (المضرب) ويدافع بدرعه (الشرشف) بكل دقة إلى أن ضرب الخفاش ضربة أصابته ووقع على الأرض مغشياً عليه ......
حذف يانغ الشرشف عليه ووقف وقفة المحارب المنتصر "بس باجي يحط ريله على الخفاش ويرفع سيفه "
أنا بين القهقهات : بتشيله ؟! ولا بتخليه !
يانغ: لا والله على هالضحك بلفج بالشرشف معاه !!!!!!!!
أنا: يهون عليك؟ أنا مراتك حبيبتك و أنت حبيبي وجوزي وظهري وسندي ..
يانغ: إيه الحين " يهون عليك وحبيبي وجوزي" .... وينج ما ساعدتيني وإلا بس فالحة تضحكين علي!!
أنا: شفتك متحكم بالوضع ما حبيت أخرب إستراتيجيتك :)
يانغ : زين ما طلعتي الكاميرا وصورتيني بعد !!
أنا: أقول ... جنه الخفاش صحى من الضربة !! الشرشف قاعد يتحرك ....
قام يانغ ولف الخفاش بالشرشف بسرعة وخذاه البلكونة عشان يطلق سراحه ..
أنا: يااانغ حبيبي
يانغ: نعم؟
أنا : مو تحذف الشرشف وياه ..ترى هذا من الطقم اليديد ....
يانغ :@#$#@$#@ ...... يتحلطم بس ما سمعت شقال !!
وسلامتكم وأبعد الله عنكم خفافيش النور والظلام :))
ملاحظة : المضرب المستعمل كان من الفلين ...
ولم يصاب أي مخلوق بأذى أثناء هذه الأحداث ولله الحمد
