البنوك حرامية!!

بسم الله الرحمن الرحيم
ببتدي مدونتي بموضوع حارق قلبي, متى بنخلص من تحايل البنوك؟
الصورة المرفقة يتني بالإيميل وبصراحة إسم هالبنك مفروض ينكتب على كل بنوكنا

مع قرب بدء الدراسة وكذلك مناداة شهر رمضان الكريم لنا بالكرم والجود, تجتاح الكويت موجة غلاء عارمة, عصفت بالمواطن المسكين إللي ما يدري هالمعاش بيكفي شنو ولا شنو!!

هني عاد يبدون الخيرين بالتسابق بالعطايا, اللي يعطيك مكرونة وطحين واللي يعطيك الخمسين ومان عليك كأنه مطلعها من جيبه, لا ويقولك وهو مو عاجبه: ترى مو بأثر رجعي. واللي راح يحارب واللي راح يشيل السيف واللي واللي .....

تييك هني البنوك وما أدراك مالبنوك, ياخي شي غريب واحد ياخذ قرض فرضا 30 الف د.ك يصير عليه 70 الف د.ك ( شلون ما تدري ؟؟؟؟؟ ) وبعد 10 سنوات من الدفع تروح تشوف قرضك وإلا أنت مسدد فقط جزء من الفوائد وقرضك مكانك راوح ..... عجيب !!!!!

وبعدين فجأة الفيزا والماستر كارد ملوتك ما يشتغلون ؟؟؟ تدق تلفون عليهم وتقولهم يا جماعة: شالسالفة ؟ ترى أنا مواطن ( تعريف المواطن: شخص كويتي الجنسية صار فيه ضغط وسكر وكلسترول .... الخ وصاكه الدهر طراقات لين قايل بس ) وعيشتي ترى على هالكروت إن أخذتوهم ترى رحت فيها, طبعا مايعبرونك وآخرتها تنزف ( إنت مواطن ).

لا والشغلة اللي أمر وأدهى, هذاك اللي ينزلونله اللمت مال الفيزا والماستر بدون علمه ( طبعا ليش يعرف؟ مو لازم هو حده مواطن ). هذي سالفة صارت مع ناس أعرفهم يدرسون في استراليا على حسابهم ( مو دازينهم بعثة لان ما عندهم واسطة, ماخذين إجازة دراسية ) وعندهم الفيزا لمت 3000 د.ك والبنك إبن الحلال قرر ينزل اللمت إلى 700 د.ك وطبعا بدون علمهم.

يتفاجئ المواطن اللي رايح مع عايلته وساكن ببيت ويدرس بالجامعة وعنده مصاريف دراسة عيالة وغيره وغيره بأن اللمت نزلووووه ( يا لهوي, ردت فعل المواطن ), يتصرقع المواطن ويقوم يدق على البنك والا البنك ماخذ معاشه كله ( شنو كله ؟؟؟؟؟ ) ومخليله 100 د.ك حق العلوك ( جمع علك ), يتوسلهم المسكين المواطن: يا جماعة حرام أنا مواطن ( الموظف بقلبه: خعخعخع يقول مواطن ) وقاعد أدرس بره و100 د.ك ماتوكلني أنا وعايلتي حتى تبن ( يكرم القارئ ) يردون عليه ببرود: انت عندك Over Limit 800 د.ك هالشهر أخذنا 400 د.ك والشهر الياي هم بعد 400 د.ك, تعليمات عليا ( من منو يا ترى ؟؟؟؟؟ ).

هذي قصة من قصص عد وخربط, ان كنت تعرف واحد يشتغل بأي بنك, إساله كم واحد ياكم ودمعته بعينه بسبة إلغاءات الكروت.
طبعا للي ما يدري ليش البنوك تسوي جذي إليكم السبب: لأن البنك المركزي حدد مهلة إلى شهر نوفمبر لكل البنوك إنهم ينزلون مديونيات المواطنين إلى أقصى حد " كل هذا عشان محد يستفيد من صندوق المعسرين ولا يربح أي عميل قضية من آلاف القضايا إللي رافعينها على البنوك".

كل شي تجمع على هالمواطن رمضان, الدراسة, العيد, إلغاءات الكروت, وهلم جره. والمسؤولين عمك أصمخ لنا, وسمع وطاعة للتجار والبنوك!!!!!

سؤال: متى بنصير مثل الناس؟؟ مو مثل المواطنين ؟