!! .. إن لم أتحلطم اليوم ..سأنفجر+ بوست دكتور بلو

بسم الله الرحمن الرحيم

التحديث في الأسفل: بوست دكتور بلو!!

حسبي الله على وزارة اللاتربية واللاتعليم


غيرتوا المناهج من الأفضل إلى الأسوأ .. ليش؟ هل هو تماشيا مع التدهور العام
غيرتوا نظام الدرجات والنسب من أسلوب عادل إلى أسلوب ظالم وغير عقلاني .. مو كافي الظلم والإحباط كل مالهم يصيرون سمة بالمجتمع .. تبون تجهزون الطلبة لمواجهة العالم الخارجي مبكراً ولا شنو؟
تخبط .. ماكو خطط .. ماكو منهج تسيرون عليه وغيره وغيره وغيره واااااااااااايد ... لين متى؟؟؟؟؟؟؟؟؟؟؟
همكم حفلاتكم .. والرقص .. وصور الإداريين تتصدر صحف الجرايد ..
ليش ما تهتمون بالإنجازات التعليمية ؟؟
ما عمري سمعت بمَدرسة منزلة خبر أن طلبتها يحملون أعلى التقادير ولا عندها أعلى نسبة تفوق !!!!!!!
مَدرسة بن يانغ الأول حصلت على 5 تكريمات على مستوى الكويت بإنجازات طلبتها
أشوف لا حس ولا خبر!!!
بس مَدرسة رايحة رحلة .. زرعوا وردة "مو شجرة.. وردة" ...
مدرسة مسوية 70 حفلة راقصة ..( إستكانة هذا سبب قدوم الجيل الراقوصي عزيزتي !!!)
هذول أخبارهم تتصدر الصحف
ويا خوفي باجر ينزل خبر:
تكرم وزارة الزفت والتحبيط المدرسة الفلانية لفوز أحد طلبتها بستار أكاديمي !!!!!!!!!!

منهج الرياضيات للمرحلة الإبتدائية الجديد عافسين فيه عيالنا وعافسينا وياهم !!!
كل ما أسأل مُدَرسة رياضيات فهميني شرحي لي ماني قادرة أدرس البنية !! الأسئلة مبهمة مو مفهومة .. حتى المصطلحات المستخدمة في الكتاب لا مرت علي ولا علي عيالي الكبار يعني بتغيرون المنهج ما عليه ... بس غيروا اللغة !! خل نفهم ..
والله أكثر من 4 مدرسات يردون علي .. صح كلامج هو صعب وبينا وبينج احنا مو فاهمين !!!
وين التحضير .. وين لقاءاتكم التنويرية والهذرة اللي دوختوا راسنا فيها !!

إذا مدرس المادة مو فاهم المنهج شلون بيدرسها عيالنا ؟؟؟؟؟؟؟؟؟

إتيي الشهادة فيها مادة وحدة "تقديرها جيد".. إنزين أفتح الصفحات التفصيلية مكتوب فيها إمتياز .. أراجعهم وأقولهم في خطأ ..
بالأول يقولون لا ما يصير وبالتالي وي آسفين فيه خطأ .... زين آخر السنة وين أصرفها كلمة آسفين؟؟؟

للحين مو فاهمة سالفة "احنا نمتحن ونحط علامات بناءً على قدرات الطفل"
زين بحصة القرآن فيه ياهل يحفظ من أول مرة .. فيه من مرتين أو ثلاث . كل طفل له أسلوبه .. وبالنهاية كلهم يحفظون ويفهمون ..
شلون يعني ؟
"للعلم المنهج الجديد "يقولون" ما يبون الأهل يدرسون عيالهم "طل" ويتم التحفيظ بالفصل ".
وللعلم بعد أغلب المدارس ما تعطي خبر للأهل عن السورة المراد تحفيظها ولا عن التحضير " يعني أشكرة إذا ما تضبط نفسك بواسطة بالمَدرسة ترى ما تعرف شي"

والأمر ساري على بقية المواد التي لا تحتاج إلى حفظ ....... ولا تعتمد عليه!!

شكلنا بنظل على التحفيظ والتلقين طول عمرنا ؟ ؟!! وبالنهاية اللي يحفظ أسرع ياخذ امتياز!!!!

أم احدى الطالبات مضبطة نفسها وتعزم بعض المُدرسات ببيتها وهات يا هدايا وخدمات لهم ولإدارة المدرسة
وقسمًا عظمًا إنها تعرف كل شي ومتى امتحانات البنات " إي صج نسيت في النظام الجديد ما يبلغونا متى الإمتحانات" وبكل مناسبة وحفلة تقوم المدرسة بتكريم هذه الأم على تعبها وإنجازات إبنتها " ترى أعرفها شخصيا وأعرف أمهات نص الطالبات بصف بنتي يعني هذه حقيقة مدمغة بأدلة السمع والرؤية بالعين المجردة"
هذا غير بنتها لما تيي تسولف عن الأبلة الفلانية والأبلة الفلنتانية اللي كانوا عندهم بالبيت أمس وشنو قالوا !!!!
التعليم والتقدير والإنجاز صار بالواسطة بعد.. يعني ما ظل شي ما يحتاج إلى قوة "واو"


أنا ويانغ نرفض القيام بواجبات أطفالنا ونحرص على تعليم الطفل الإعتماد على النفس والعمل بمجهوده خاص..
والله إني قبل بداية المدرسة علمت بنتي شلون تسطر وشلون تحط ستكر بعد "لأني أدري بالمدرسات من قبل يموتون بالشكل والزينة"
بينما هناك أمهات أعرفهم يسطرون دفاتر بناتهم بالألوان ويرسمون بنفسهم ويقومون بعمل الواجبات بدلاً عن بناتهم " لا وفي بعد يسوون بحوث عيالهم بالجامعة والله على ما أقول شهيد"

وأثناء احدى اللقاءات :
المدرسة: يا حليله دفتر بنتج يهبل عطيتها علامة كاملة والله !!
الأم: إي والله أقعد وأسطره وأزينه لكم وأتعب عليه ... هي هي هي
المدرسة: إي والله أدري إن انتوا ولا وين هالبنات يقدرون على جذي .. هي هي هي " ويعة تويع إبليس"

أحد يقول لي وين العدل ؟؟ كيف تتحقق العدالة في تقييم الطالب\ة على حسب مهاراتهم ؟!!؟!؟!؟!؟
هل العدل في إن الطلبة والطالبات ياخذون علامات على مهارات آبائهم والخدمات التي يقدمونها .............
بعدين نتحلطم ما أدري شفيه مجتمعنا إتكالي وما أدري شفيه مجتمعنا يدور على الساهل ... ترى هذا ذنب الأباء والأمهات الذين أسسوا الإتكالية بعيالهم وذنب النظام الذي يكافؤهم !!!!!!!!!!!!!!!

تدعونا إدارة المدرسة إلى إجتماعات لمراجعة العلامات ويسمونها لقاء تنويري !! السنة باجي لها شهر وتخلص وللحين تنويري؟
وتقعد المديرة تهذر ساعة وتصوير وعفسة ولين خلصت يالله باقي 15 دقيقة على إنتهاء الوقت
وسووا الحسبة أمهات طالبات أولى إبتدائي كلهم وآبائهم لديهم ربع ساعة لمراجعة أداء بناتهم من والحصول على أجوبة من المُدرسة الأولى فقط لكل مادة !!!!!!!!!!
ومرات نلاقي بس 3 مدرسات أوائل واقعد اشحت على الباجي ...................

أدري في مدرسين ومدرسات فيهم الخير والبركة والله يعينهم ويقويهم .. يبذلون مجهود وجميعنا يشيد به .. ولو خليت خربت
ولكن الفشل في الوزارة بكبرها من راسها لين ريولها .. إدارة فاشلة وتنظيم وتخطيط أفشل !!
وحين أنتقد أو أتحلطم مثل اليوم من حرة ما بقلبي
مو موقف ولا أثنين ولا حتى ثلاث .. طول السنة شي ورا شي
والأمور كل مالها تنحدر من سيء إلى أسوأ...
فرجاءً رجاءً رجاءً لا تقعدون تبررون لي وتقولون إي بس فيه زين وفيه جذي
لأني أدري والله أدري وكلامي غير موجه للزين والسنع !! بل لمن تشوبهم العيوب التي أنتقدها وهم بازدياد
ولحد يقول لي الإحباط وعدم التقدير يسوي جذي !!
إذا تنحبط وتحس بعدم تقدير للدرجة اللي تتسبب فيها بظلم الطلبة وعدم القدرة على العطاء .. اقتص الحق من نفسك وهد التدريس .. حرام عليك !!

كل فترة إمتحانات لازم أراجع مَدرسة بن يانغ وأكلمهم بخصوص لجنة التصحيح "الكونترول" في أكثر من غلط بالتصحيح آخر مرة 5 علامات !!
5 درجات مو 1 مو 2 بل 5 درجات
حسبي الله ونعم الوكيل فيكم
مستقبل عيالنا
مسسسسسسسسسسستتتتتتتتتتتتتتقققققققققببببببببببببببببببلللللللللللللللهم
فاهمين شكبرها هالكلمة؟؟؟
هم الغد
هم الأمل

لو عيالي كسالى
لو عيالي مهملين
قولوا يتدلعون
اللي باط جبدي من المتفوقين .. وقد قامت المنطقة التعليمية والوزارة بتكريم مَدرسة إبني على إنجازات قام بها بن يانغ وطلبة آخرون
يعني هذا بدال ما ترعونهم وتشجعونهم من طيح الله حظ............إبليس زين

بإمتحان اللغة العربية
يأتي سؤال
أكتب رأيك

أكتب : معناها ..دون .. سجل .. عبر بالكتابة أوكي
رأيك شنو معناها ؟؟؟؟؟؟؟؟؟؟؟؟؟
رأيك = فكرتك = وجهة نظرك =آراءك الخاصة = تفسيرك العقلي وفهمك . أوكي؟

تأتي نتيجة الإمتحان ويجد الطالب بأن إجابته خطأ وكتب عليها (يجب كتابة إجابة نموذجية)
شنو ؟
من متى رأي الواحد يخضع لإجابة نموذجية ؟؟؟؟؟ ولا هذي سياسة جديدة ؟؟؟؟؟
حسبي الله ونعم الوكيل

أيام الفصل الدراسي نراجع ونتعب واللي يذبحني المكابر والعناد!!!
ترى كلنا خطاؤون وجل سبحانه من لا يخطأ
ليش تكابر وبالآخر وبعد نجرة وكلام مع المدير والوكيل ترضى تراجع الإمتحان وتلقى كلامنا صحيح وإن فيه خطأ بالتصحيح!!
موالفشلة لك ترى
من الأول قول إن شاءالله خل نراجع وتصير سكاتي حفاظا على غرورك
على أبو إنه احنا ما نغلط وهذا كنترول ومستحيل فيه خطأ .. الطلبة يضيعون
مجموع العلامات التي تم تصحيحها تتعدى الـ20 !!!
خافوا الله في الطلبة يا ظلمة ...............!! منكم لله

آخر السنة شنسوي ويا كنترولكم ..شلون نراجع بالله ؟


وين راحت الذمة وين راح الضمير .. لعبتوا بأعصاب عيالنا وبأعصابنا من حسبي الله عليكم
بسكم بس .. نوايا خفية ومصالح وحروب إدارية وتكسب وزاري ومحد ماكلها غير عيالنا


ياهو تخبط ياهو ظلم
هل تعلمون بأن المسابقات على مستوى المنطقة التعليمية والكويت تدخل فيها الواسطة والمحسوبية؟؟
وهالكلام عن لسان المسؤول عنها ...............

هل تعلمون بأن بعض الطلبة يقومون بتقديم بحوث وأنشطة إضافية ... ويأخذونها بعض المدرسين ويقدمونها بأسماء طلبة آخرون !!
بن يانغ الأول قبل 3 سنين قدم بحث حيوي عن التلوث البيئي وباللغة الإنجليزية للمدرسة ...
وبعد 6 شهور رأينا بحثه قد نال على المركز الأول ولكن بإسم طالبة غريبة ما نعرفها واكتشفنا إنها إبنة احدى الإداريات في نفس المدرسة !!!!!!!!!!!!!
وللعلم ترى بن يانغ ما كان يدري عن المسابقة والسالفة كان فيها جائزة مالية .............
المدرس المسؤول عن "تعليم" الطلبة يقوم بالسرقة الأدبية والتزوير بمساعدة من زميلته ..... ويسألون شفيها مخرجات التعليم وليش الدنيا تتغير !!

وهل تعلم أن هناك أكثر من 12 هل تعلم أخرى لم أكتبها؟؟؟؟

بس قلبي قام يعورني
ما أتحمل أتحلطم وايد ...
تعبت مع إن باقي في الجعبة الكثير الكثير الكثيييييييييييييير
وما قلت لكم شي.... الله يشهد إن الذي كتبته نقطة في بحر




لا حول ولا قوة إلا بالله العلي العظيم

تلفتوا الديرة وراح تتلفون الجيل القادم من حسبي الله عليكم

يا رب يصلح أمورنا ويرزقنا بإدارات واعية وفاهمة تعيد هالبلد لمسار التقدم والتطوير
وأعوذ بالله منكم يا مشيعي الظلام والفساد والضلال والتخلف

تحديث: "جزاه الله كل خير دكتور بلو على بوسته : " وزارة.. رفع الضغط! " المهم والحيوي عن الأنفلونزا المكسيكية
"swine flu"
أحسن من أي محطة إخبارية بالكويت ماشاء الله عليه !!
تابعوه لآخر التحديثات والتطورات.. شكراً يا بلو والمفروض وزارة الكحة تتعلم منك كيف تكون التوعية الحقة وأساليبها