بسم الله الرحمن الرحيم
كنت بنزل بوست أمس بس إحترق ..لأن في شخص سبقني فيه :(
فقررت أحكي لكم حكاية من حياتنا.
المكان: شقتنا بفانكوفر- كندا
الموقع:على ضفاف نهر يفصل ما بيننا وبين الجبال الرائعة ..
كل صورنا احنا موجودين فيها .. فحطيت لكم هذي "مصدرها حجي جوجل"
الزمن: 12:30 من صباح أحد أيام 2001
ليلتها كنت أتابع فيلم شيق في ظلمة الليل وحدي.. وكانوا يانغ والأولاد نايمين.. الجو كان جداً بديع "كعادة فانكوفر" فقررت ترك باب البلكونة مفتوحا .....
مسوية جو ومطفية الليتات .. ومندمجة بالفيلم ........ ولا ألمح حركة بطرف عيني .. التفت صوب الحركة وما شفت شي .. قلت لنفسي يمكن ظلال الفيلم من التلفزيون ...
رديت أطالع الفيلم ... ولا أسمع صوت حفيف على رفرفة أجنحة ... وطيت صوت التلفزيون ... وقمت أتبع الصوت ..
أحس بشي يطير بس ما أشوفه ... شغلت الليت ولا طير عود يخطف فوق راسي ..
قلت حق نفسي "من وين دخل هالطير؟ ولين الحين شلون أطلعه من الشقة .... ماكو إلا خبير الطيور" فقررت إني أقعد زوجي العزيزمن النوم... دشيت الدار شوي شوي .. ووقفت على راسه ..
قعدته بصوت واطي وبحنية :)) : يانغ ... يانغ حبيبي
ما قعد
أنا: يانغ ....يانغ !! ماكو فايدة قمت عليت صوتي : يانغ حبيبي ؟
يانغ: همم ... شنو " والنوم للحين بعينه"
أنا: قوم بقولك شي !!
يانغ: وإنتي ما تحلى سوالفج إلا تالي الليل !!خليني أنام والصبح سولفي على كيفج .
أنا: قوووووم في شي بالشقة !!
يانغ: شي شنو ؟ لا تقولين لي شي خربان وتبيني أصلحه هالحزة !! خير؟
أنا: في طير عود وغريب قاعد يطير بالشقة!!
يانغ: مقعدتني على" طير" ؟ خو طفي الليتات .. الطيور ما تشوف وتدعم بالظلمة ... وفتحي البلكونة وراح يطير ويطلع منها...
أنا: يعني..؟ بس الليتات كانت طافية شلون دش؟ ..
يانغ: شدراني شلون دش!! إنتي بس طفي الليتات ويطلع ... ورد حط راسه ونام!
أنا: أوكي ... رحت طفيت الليتات وقعدت بالصالة .. وووووووووووووووووووششش ولا طاير بيني وبين شاشة التلفزيون !! طالعت عدل ولا جنحانة وايد عودة وجسمه عليه شعر وماله منقار !! وراسه كلش مو راس طير!!
قلت لنفسي: يا ربي هذا جنه خفاش!!!!!!!!!!!!!!!!!!!!!!
ووووووووووووووشششششششششش طار أقرب مني وشفته عدل !!!!!!!!!!!
طلع خفاش ونص !!!!!!!!!!!
ركضت بسرعة البرق للدار
أنا: يانغ قوم قوم قوم ........... قوووووووووووووم بسرعة !!!!!!!
يانغ: شنو... شصاير بسم الله !!!
أنا : الطير شكله مو طير !!!
يانغ: هه؟!؟
أنا: اقولك الطير... طلع خفاش !!!!
يانغ: خفاش؟؟ خفاش ؟؟ بالله من وين بيطلع لنا خفاش؟ إنتي لو تبطلين أفلامج الخيالية وأفلام الرعب تصيرين خوش مرة!!
أنا: أقولك خفاش تقولي أفلامج وخرافاتج !! قوم صيده !!
يانغ : إنتي ما راح تخليني أنام لين يطلع هالطير ..
أنا : أقولك خفاش تقول لي بتنام ..... يالله قووووم !!!
يقوم يانغ وهو يتحلطم " من وين طلع لي هالطير هذا بالله .. لا وتقولي خفاش ..زين ما تقولي دراكولا "
أنا: خفاش .......... مو طيرولا دراكولا :((
يطلع يانغ ويتمشى على الراحة وأنا وراه .. ما شفنا شي لين وصلنا الصالة .. سمعت صوت قريب من باب الشقة قلت له جرب صوب الباب وأنا بشوف باجي الشقة .. راح يانغ وقام يطفي الليتات ويشغلها ويبحث عن الطير/الخفاش...
وصلت الممر اللي بين غرف النوم .. ولا هاللي يايني ووجهه مخطوف ..........
يانغ: أقول !! ............. هذا خفاش !!!
أنا : صج ...؟ والله...؟ وأنا صار لي ساعة شقاعدة أقولك .............. شلون الحين ؟
يانغ: ما أدري...... إنتي شرايج؟
أنا: تصيده!!!
يانغ: بالله أنا شدراني شلون يصيدون خفافيش!!!
أنا: إمسكه .. طقه !! ولا خرعه بعصاية المخمة لين يطلع من الشقة!!
يانغ: همم ....... شوفي إنتي مسكي العصاية وأنا أخرعه وأخليه يطير صوبج ولين وصل طقيه..!!!!!!!!
أنا: يا سلام على الخطة!!......... بالله عضني؟
وفي خضم النقاش ولا هالخفاش طاير فوق راسنا وسِيده على دار اليهال !!!!!!!!!!!!!!!!!!!
أنا قمت أصارخ: دش دار اليهال .. دش دار اليهال.. دش دار اليهال !!
واركض جني مينونة وادش دار اليهال وأغطيهم من راسهم لين ريولهم ... وأسحب لي شرشف من الكبت المبطل وأقعد أهش الخفاش ..
ناقزة مني .. وناطة مني.. وهاشة مني .. وألقى مضرب البيسبول الفلين الخاص بـ" بن يانغ الأول" وأشيله .. واوقف شرشف بيد والمضرب بيد والشعر منكوش من المناقز... واقفة وقفة استعداد للهجوم والدفاع !!
طار يمي وارقعه بالمضرب بس ما حشته... جربت مرة ثانية وبوشت .. وهشيته بالشرشف الهشة الأخيرة وطار برة غرفة اليهال ... ركضت وراه بسرعة وسكرت الباب !!
أتلفت يمين ويسار أدور على زوجي العزيز المقدام " يانغ" ما أشوفه !! ناديته : يانغ ؟؟
ولا يتبطل باب دارنا شوي شوي ... ويطل رأس زوجي العزيز من وراه ويقول لي بهمس: صدتيه ؟
أنا أيضاً بهمس: لا !! ........ بس أنت شتسوي بالدار؟
يانغ : خفاش وطاير صوبي شتبين أسوي له أوقف وأمد له رقبتي ؟؟
أنا: لااا ............ تدش الدار وتخليني بروحي !!
يانغ : مو يقولون الأم تصير أقوى من 10 رياييل إذا صاروا عيالها بخطر ؟؟ حسيت فيج متحكمة بالوضع !!!!
أنا: أقول هاك ........... عطيته الشرشف والمضرب ......... وقلت له : دوري خلص واليهال بخير ..... روح شوف شغلك !!
يانغ : أووف ..... عطيني إياهم وأمري على الله .......
أخذ يانغ عدة الحرب ولحق بالخفاش ......... وطبعا ما قدرت أوقف بمكاني وأخلي زوجي حبيبي ونور عيني بروحه :))
لحقته لأشهد معركته مع الوحش الطائر وأشجعه ....
بدا يانغ يهشه من بعيد لبعيد لين حكره عند مدخل الشقة ... وقام لف الشرشف وقعد يضرب الخفاش "طبعا الخفاش ما يشوف ويعتمد على الصوت " فكان أسرع من يانغ ويتحاشى كل ضربة .........
للحين أنا بس واقفة وأتابع إلى أن وقف الخفاش على ظهر يانغ وهو ينحني ليلتقط الشرشف بعد ما طاح من يده ..
شهقت : ياااااانغ وقف على ظهرك ... على ظهرك ... دير بالك !!!!!!!!!!
قام يانغ يناقز..... ويهش يمين ويسار وفوق راسه .. والخفاش يطير يمين ويسار ... ويانغ يلعن ويهش ويدور على نفسه ..وما أسمع إلا : وقف الله يلعنك من خفاش !!
هنا بدأت أضحك " ما أنلام شكله يضحك"
يانغ يتصارع
وأنا أضحك لووووووووووووووووول
أنا أضحك ......... والخفاش يتحاشى ويطير .. .. هني حس يانغ إن أنا والخفاش نضحك عليه !!! خزني من طرف عينه ورد للخفاش ...
عصب ريلي .. وحمى الوطيس .............. تغيرت وقفة يانغ وصار يضرب بسيفه (المضرب) ويدافع بدرعه (الشرشف) بكل دقة إلى أن ضرب الخفاش ضربة أصابته ووقع على الأرض مغشياً عليه ......
حذف يانغ الشرشف عليه ووقف وقفة المحارب المنتصر "بس باجي يحط ريله على الخفاش ويرفع سيفه "
أنا بين القهقهات : بتشيله ؟! ولا بتخليه !
يانغ: لا والله على هالضحك بلفج بالشرشف معاه !!!!!!!!
أنا: يهون عليك؟ أنا مراتك حبيبتك و أنت حبيبي وجوزي وظهري وسندي ..
يانغ: إيه الحين " يهون عليك وحبيبي وجوزي" .... وينج ما ساعدتيني وإلا بس فالحة تضحكين علي!!
أنا: شفتك متحكم بالوضع ما حبيت أخرب إستراتيجيتك :)
يانغ : زين ما طلعتي الكاميرا وصورتيني بعد !!
أنا: أقول ... جنه الخفاش صحى من الضربة !! الشرشف قاعد يتحرك ....
قام يانغ ولف الخفاش بالشرشف بسرعة وخذاه البلكونة عشان يطلق سراحه ..
أنا: يااانغ حبيبي
يانغ: نعم؟
أنا : مو تحذف الشرشف وياه ..ترى هذا من الطقم اليديد ....
يانغ :@#$#@$#@ ...... يتحلطم بس ما سمعت شقال !!
وسلامتكم وأبعد الله عنكم خفافيش النور والظلام :))
ملاحظة : المضرب المستعمل كان من الفلين ...
ولم يصاب أي مخلوق بأذى أثناء هذه الأحداث ولله الحمد
52 comments:
على قولة عادل إمام في شاهد ما شفشي حاجة:
أنا بخاف من الكلب يطلعلي أسد :)
أنا أخاف أمسك بلبل, تبيني أصيدلج خفاش ؟!؟!؟!؟
بس فالحة تشوفين أفلام رعب وترعبيننا معاج, لييييييييييش؟!؟!؟!؟
لما نشوف فيلم رعب تنقزيني 20 الف مليون مرة :(
منتي قد الرعب خلج على الرومانس والكوميدي, ليش تعذبيني معاج :(
أنا مسكين, إنسان مسالم أنام مع الدياي وأصحى مع تعوعي الديج, مفززتني وأنا نايم وأحلم أحلام وردية ليشششششششش؟؟!؟!؟!؟
بعدين قولي الصج, انا انخشيت بالدار صح, ولكن من خرعني ؟؟؟؟؟
على صراخج لو طرزان موجود جان حذف نفسه من البلكونه.
بعدين ذكرتيني ليش كنتي تضجكين علي وأنا أناقز يوم طب الخفاش على رقبتي :(
تبيني اصير فامباير :(
وهم للتذكير منو صاد الخفاش؟
صج مادري شلون بس صدته.
الكلام وايد والقلب متروسة.
منك لله يا زالمني :(
Yang:
لووووووووووووووووووووول
لما أنقزك واحنا نشوف فيلم رعب قاعدة أسوي جو وقاصدة أخرعك :))
منو مسكين؟؟؟؟؟؟؟؟؟
لووووووووووول
أقول أخاف بس صج كنت أصارخ !!!
أول مرة أسمع بصراخ مساسر !!! صراخ بهمس يخرع بالله؟؟؟
لو كنت أصارخ جان قعدوا اليهال !!!!!!
عفية طرزان يخاف من صرخة ..........
أنت اللي صدته.. يا حبيبي البطل :))
منو زالمك؟؟؟
عثماني قط الحجوة وبلشني فيها الحين !!
صج تحسفت ما صورتك فيديو يومها لووول
ليش ما ذكرتي لما بن يانج الأول قعد من النوم مخترع من صراخج, وانت شنو رديتي عليه:
نام يمه انت قاعد تحلم :)
بعدين ظلم بلا ظلم.
انتي تشوفين أفلام رعب وأنا أصيد خفافيش ليش؟؟؟؟
Yang:
أقول بنقضيها سهرة على التعليقات الليلة ؟؟؟؟
خو قاعدة يمك !!! كلش كلش بطل المسنجر لوووول
ما قعد من صراخي !!!!
قعد يوم أنت تتعارك مع خفاشك وخذته الغرفة ونومته وقلت له يما أنت قاعد تحلم لين قعدت الصبح سولف لي عن حلمك !!!!!!!!!
تذكر عدل .... ترى الكبر شين !!!
لا انا ابي اسولف أمام الملأ.
مايصير هاكزا, خليتيني أذبح الخفاش المسكين, مو كان ابرك لو داقين على 911؟؟
أنا شيفكني من صلاح بيك اليوم, انشاء الله ينقطع الانترنت عندهم, ومايرد إلا بعد اسبوع عشان الحق انزل جم بوست وضيع السالفة :)
عاد Yang ذيك المرة ذكر خوش طريقة لزووز الله يردها و الوالدة بالسلامة إن شاء الله ..
استغربت ليش ما سواها !
خلطة سرية للتخلص من " الخفافيش":
إخلط قطعة رخام صغيرة مع فلفل أسود وسكر(بحالة الخفاش تستبدله بدم ذبيحة و بسنجاب من الحديقة المجاورة), يأتي الخفاش ليمتص دم السنجاب فيعطس من رائحة الفلفل فيرتطم رأسه بالرخام فيموووووت.
و بس :)
Safeed:
لوووووووووووووووووووووووووووول
ماشاءالله عليك
ماشاءالله ذاكر الطريقة .. أنا أعتقد كان يانغ مو مكتشف هالطريقة على أيامها :))
ما شاء الله عليك, ذاكر الخلطة :)
شكلك مطبقها :)
بعدين ياخوي وين تخليك تخلط, ذبحتني عيالي وعيالي جنها بس هي اللي عندها عيال :)
خلتني أضطر لإستخدام العنف :(
تحياتي
هاهاهاهاهاهاااااااااااي
صج، الواحد اشلون يتعامل مع خفاش
احنا هبابنا رقيعي داش بالغلط
مردم لافي من العطش، زرزور الشمس قاصته قص و الا عتوي زقرتي يدور البراد، مو خفاش، لا و توك بعد قاعد من النوم
الصراحة سالفة ما تنسي طول العمر
:-)
دمتم و الأهل و الأحبة برعاية الله
يا صباح ال
sensors o el echolocation
looooooooooooooooooool
مو خوش سالفة.... الله يحلل زهيوية الكويت عنهم!!
كلش كلش... قطو يدش بالغلط!
خفاش ولا عنه!!!... زر عقلي لما دخل دار اليهال الله يحفظهم
تصدقين ان فيني نفس طبعكم!... ما احب اذبح او اسبب عاهة مستديمة للكائنات الغير بشرية!... تلاقيني الفلف الزهيوي بالكلينكس واطلق سراحه بالحوش!... بروح عمرهم قصير... احتحته زيادة بعد!
.
.
.
طلعتي فانكوفرية؟:)... عيل أكيد سياتلية!! وبالمرة كاليفورنية
:)
وصباح ال
wild wild west:)
Yin , yang
صبحكم الله بالخير
كل خفاش و انتوا بخير ان شا الله
:)
اخيتي yin
الحين yang المسيكين حاط راسه و نايم نومة الاطفال
ياي تعبان و حط راسة و نام .. لو هو فيه حيل جان قعد يجابل الفيلم وياج
اتيين و تقعدينة من عز النوم علشان .. خفاش !!؟
انا اتصور لو كانت باميلا اندرسون مارتكم البيت و yang نايم .. ما راح تقعدينه .. عدل ؟؟
Yang
لاحظت ان اخيتي yin كان عندها نية تصورك فيديو ... يعني توثيق السالفة صوت و الصورة ؟
اقول قولي هذا ... و السلام عليكم و رحمة الله و بركاته
لوووووووووووووووووووووووووووووووول
والله عندكم مغامرات خطيرة p;
الأعزاء .. يان ويانغ
خطاكم السوو ..
سالفة عجيبة من قلب ..
أنا أخبر .. الواحد يطلع زهيوي أو بريعصي .. لكن خفاش .. شي مو يخرع إلا يصروع ..
يان .. الصراحة الله يعطيج العافية ..
ويانغ .. للضرورة أحكام .. كان لازم تقوم عيل تخلي يان بروحها تقاتل ..
أقول .. كنت مخططة أروح فانكوفر يوماً .. الحين هونت .. السالفة فيها خفافيش ..
**
يان سردج للواقعة أكثر من رائع .. ضحكت من قلبي ..
الله يعطيكم العافية ..
ويحفظكم ..
ويديم السعادة عليكم وبقلوبكم
تحياتي
هههههههههههههه
زوووووووووووغه
بدعتوا
البوست يغشي من الضحك
وتعليقاتكم تغشي اكثر
اتخيلكم وانتوا تهاوشون على الجهاز عشان ترودون على بعض ،،،
عموما يقولون العبره بنهاية
يانغة بطلة في اولى
بس النهاية لازم تكون في ايد البطل (=
وطمنونا على الشرشف !
ذكرتيني يانغ مرة قاعدين بمطعم باخر الليل ويمرون علينا خفافيش وايد واختي تقول لا فراش !!!! فراش باخر الليل وهل كبر
غيري بدلي مو راضية واحنا قعدنا تحت الطاولة (=
لما صارت بالمواجهه فيس تو فيس معاه جنت !!
كااااااااااااااااااااك
والله صحكت عليكم وقاعدة اتخيل لمن ركضتي على غرفة اليهال لووووول
وناسة والله جان زين انا جارتكم بدقيقة امسكه افا عليكم بس لووووول
وانتي بعد الله يهداج ليل ومبطلة البلكونة لووووول
الله يبعد عنكم الخوف لوووول
بو محمد:
ما في خطة ولا استراتيجية معينة .. كله كان على البركة !!!!!!!!
صج ما تنسي .. أصلا كل ما أذكرها أضحك !!!
قلت خل أوثقها للتاريخ :)))
الله يخليك ويحفظك لأهلك ويخليهم ويحفظهم لك يا رب
:)
...............
chandal/danchal!!:
يا مساء الـ
sensors o el echolocation
لوووووووول
يا ريت كان عندي قدرة الإيكولوكيشن ليلتها !!!
ياني ضحكت ضحك !!!!!
تصدقين ما خفت إلا يوم دخل غرفة اليهال !! أدري ما يعض بس وقت المواجهة تفقدين العقلانية مولية !!!
يا حنينة :)))
لا والله مونتريالية وميدويستية !!!
فانكوفر جو وجمال طبيعة بس ما ارتحت فيها وايد !!!
منورة يا وايلد وايلد ويست إنتي :))
عثماني :
مساك الله بالخير
وأنت بخير وعقبالك :))
إذا ما أقعده على خفاش أقعده على شنو ؟؟؟
هذا خفاش مو زهيوي :)
لا والله هو ما يقعد حق هالأمور ألف الحمدلله :))
لووووول
يعني تشيشه ؟؟
خو قلتها أشكرة وصاجة لو كان عندي وقت ولا فاطنة للسالفة ليلتها جان صورته :))))))))))))))))))))))))))))
أرد عليك بقولي هذا وحياك الله وعليكم السلام ورحمة الله وبركاته
Aurous:
حجيجة شلونج وشخبارج؟
أهم شي ضحكتي على مغامراتنا !!
والله عندي بعد بس ما أقدر أكتبهم للملأ ولا جان يحلل دمي :))
منورتنا يا حجيجة :))
بنت سيف الغالية :
خطاج اللاش بعد جبدي :))
أنا تصروعت يوم دش عند اليهال ويانغ تصروع يوم جبل عليه :))
الله يقويج حبيبتي
لا تخافين روحي فانكوفر وانتي مرتاحة البال بس لا تبطلين بلكونات :))
حبيبتي الأروع زيارتكم واستمتاعكم والله
ويا رب الضحكة ما تفارق مبسمج
ياني استانست يوم قريت إنج ضحكت من قلب ... الله يسعد قلبج يا بنت سيف تستاهلين كل خير :))
يعافيك ويحفظك من كل شر يا الله
:)
منورة المدونة :)
ركبنا :
:))
المهم ضحكتي مثل ما ضحكنا
وعجبك البوست .. ترى القصة مو كاملة وتم التصرف بها حفاظا على روحي من الغالي :))
عادة نستعمل لابتوب واحد .. بس البارحة كل واحد ماسك لابتوب ويكتب !!
اللي بط جبدي قاعدة يمه وما أشوف الا تعليق منه !!! خو قول لي لووول
ما تخافيش الشرشف رجع صاغ سليم :)))
لووووول
شفتي مواجهة الخفافيش ليست نادرة :))
حياك الله دائما
:))
طموحة مملوحة :
لووووول
شكلي كان جنان ... بحياتي ما ركضت بهالسرعة !!!
أما عاد تمسكينه بدقيقة هذي شوي قوية لووووول
والله ما انلام الجو روعة ودايما أبطل البلكونة .. وليلتها كانت أول مرة أكتشف إن فانكوفر فيها خفافيش !!!
ويبعده عنك يا طموحة :))
حياج الله في الخيمتنا دوما :)
بصراحة قصة غريبة ..الله ستر عليكم وعلى عيالكم..
و وأهنيج على شجاعتج وبسالتج ..
واهني زوجج على مساعدتج على الرغم من خوفه ..
AbWaBy:
ما غريب إلا الشيطان يا أختي :)
والحمدلله على كل حال
يوم كنا بأمريكا عادي تطلعين بحديقة البيت الخلفية وتلاقين غزلان ماكو مشكلة :)
الله يسلمج ومشكورة
لووول
يختي ما كان خوف بس ردة فعل مفاجئة :)
والعبرة في الآخر !! لو ما يانغ ما انتصرنا على الوحش الطائر :))
حياج الله في زيارتك الأولى :)
عزيزي بومحمد:
والله كل ما اتذكر نفسي وأنا اناقز يوم طب علي الخفاش أموت من الضحك.
بس ذكرى ما تننسي :)
أخيي عثماني:
مو غريبة تصوير الفيديو طال عمرك, أتوقع كل شي منها, جان الحين تشوفني باليوتيوب.
وعنوان الفيديو:
زوجي تصرقع :)
تحياتي لك
اختي بنت سيف:
لاتغيرين رايج بروحت فانكوفر, فهي أكثر من رائعة.
وسالفة الخفاش ترى عادي أدز معاج ين, صار عندها خبرة الحين :)
تحياتي
إختي مركبنا:
شكرا للإطراء :)))
ونستيني :))
بعدين انا خليت ين تحارب اول عشان اقوي قلبها, مو عشان انا كنت خايف :)
تحياتي
أبوابي:
أفا :(((
انا ما كنت خايف, انا كنت اختبر قوة زوجتي بس :)
حياكم الله :)
testing
ههههههههههههههههههههههههههههههههههههههههههه
لوووووووووووووووووووووول
شالتخررررررررررع في انصاااااااص الليوووووووووووووووووول
والله اننننننننننننج قدعه
ماشاء الله علييييييييييييج
هههههههههههههههه والله مت ضحك
خفافيشششششششششش
احنا زهيويه نمووووووووت هالنوبه خفاااااش
البوست بصوووب وكومنتاااتج انتي و بعلك في صووب ثاني
lawyer:
يا هلا ومرحبا بك في زيارتك الأولى لنا :))
لووول
قدعة بحء وحئيئي :))
والله عاد مسكين الخفاش كان خايف منا أكثر من خوفنا منه لووووول
الرعب منهم بسبة هالأفلام ولا مساكين لا لهم ولا عليهم مضيع خنت حيلي ودش عندنا
:))
المهم إتبسطوا من القصة وشاركتونا ذكراها المضحكة :))
الكومنتس شي ثاني .. أشتغل علي تعليق وأنا ما أدري أقوله قول لي ليش تكتب يقول لا بسولف على الملأ !!!
مشكورة على المرور وحياك الله في كل وقت
:))
ماشاء الله
انتو نكتة...
خوش بوست خفيف دم
طلع الزهيوي احسن ..!!
أنا قمت أصارخ: دش دار اليهال .. دش دار اليهال.. دش دار اليهال !!
و الله قلت بقرى انك حذفتي بعلك العزيز يمين و خذيت ملاس و طرتي الغرفه
ضوء المطر:
لووول
القصة النكتة مو احنا لوول :))
تسلمين أختي ومشكورة :))
وي الزهيوي زرزور يم الخفاش :)
حياك الله أختي بزيارتك الأولى
:))
Enter-Q8:
أخي الكريم حزتها ما يمدي الواحد يفكر
أنا ركضت وراه وقلت أدبر عمري حزتها واللي شفته جدامي خمطته
:))
وبعدين يانغ ما مداني أحذفه يمين العزيز كان داش الغرفة ومسكر الباب بعد
لوووول
:)))))))))))))))
يعلج العافية والستر
مت من الضحك
ربي يسعدج يارب
خوش بوست يشرح القلب
واهم شي يانغ اللي منخش وناطرج تصيدين الخفاش
الزين :
يا ربي يستر عليج ويعافيج وكل من يعز عليج قولي آمين
لوووول
بعيداً عن جو السياسة والقمتة قلت أوثق أحداثنا للتاريخ وأحط عليها شهود لوول
الله يشرح قلبك ويسعدك دنيا وآخرة يا الزين
لووول
بس شفتي شلون بالآخر إضطر يروح وراه ؟
:))
حياج الله ومنورتنا بزيارتك الأولى
:)
ههههههه
والله موقف عجيب ويضحك ويخرع بنفس الوقت لو انا مكانج اطلع من الشقه اصلا يمكن انط من البلكونه لول عيل خفاااااش
كله بصوب والمناقز بغرفه اليهال بعده الحرب زين ماخترعوا مساكين
اما موقف زوجج لول لا تعليق اخرتها منخش بالغرفه وناطر انتي تصيدينه
الله يحفظكم ويبعد عنكم كل شر مستانسه اخيرا قدرت اعلق :)
Angel Heart:
لووووووووووووووووول
تنطين مرة وحدة ؟؟!!
إسم الله عليج على جذي عساج عمرج ما تشوفين خفاش !!
المناقز مأساة ... شكلي جنان :))
وريلي خليها على الله حزتها بس هم أرد وأقول العبرة بالنهاية هو طلع البطل :))
ليش ما تقدرين تعلقين؟؟
شسالفة التعليق عندنا الكل يشتكي!!!
أحد يقول لي ؟
منورة بزيارتك الأولى والله يسلمك ويبعد عنج شرور الدنيا والآخرة :)
:)
يا حلوكم ويا حلو طينتكم
ربي حافظكم من كل شر
موتونا من الضحك على الموضوع وتعليقاتكم
اتخيل انا وصلاح الي قاعدين يم بعض ونعلق على بوستات بعض
بس حلوة لحظة الضرب بالشرشف والمضرب مال البيسبول
والمناقز والنظ والكشة
لول
خيالي واسع ترا يا ين
يا حبيبتي
وبعدين تخيلت الحجي يانغ
يشوفج بنص عين وانتي مهسترة من الضحك
عاد الريال ما يحب يحط نفسة بهالمواقف
بس سفيد ما شاء الله عليه
مو ناسي هالوصفة السرية
:)
دمتم بالف خير يالغالين
:)
الصراحة على هالبوست احس ضحكت وايد و طلعت قهر الامتحانات اللي سلبت ضحكتنا
انزين انا اقول لو مقعدين العيال و يشوفون الخفاش هذي لحظة ماتتكرر و يمكن بعد واحد من العيال يصدق و يخلي الخفاش يعظه و يصير باتمان
خطاكم السو , ربي حافظم من كل سوء
Manal:
والله عيونج وروحج اللي حلوين !!
يكفيني إني خليتج تفرفشين يا عسى ربي يديم على مبسمج الضحكة ويسعدج دنيا وآخرة :))
سكتي كل واحد لابتوب والمشكلة يمي على القنفة !! وما أشوف إلا "لديك رسالة" أفتحها على الإيميل ولا تعليق منه !!
أرد عليه وأكركر لوووول أفضح نفسي ويروح يشوف وهلم جرا :)
أصلا القصة يبيلها خيال واسع .. القراءة بكبرها يبيلها خيال واسع عشان الواحد يسمع الكلام اللي يقراه ويشوفه بعد :)
سفيد ماشاءالله عليه شكله عجبته الوصفة ومجربها بعد لوول
الله يخليج ويحفظ لج كل غالي يا أختي الغالية :)
dr-maarafi:
الله يعينك يا دكتور على الإمتحانات والأوضاع السياسية المزرية !!
والحمدلله طلع القهر وتقدر تجابل إمتحاناتك بروح مرحة إن شاءالله ...
لا يبا محنا ناقصين باتمانز الديرة فيها سوبرمانز وباتمانز وسبايدرمانز زايدين عن الحاجة ونبي الفكة منهم !!
خطاك اللاش والله يحفظك ويوفقك :)
السلام عليكم ،
ربّي يحفظكم .. من زمان ما زرت هالمدونة ، اليوم قلت خل أشوف شنو أكو شنو ما أكو وسامحونا على القصور ، بس مت من الضحك .
صراحة يا Yang إنك بطل ، أنا حتّى من الدياي أنحاش ، خفّاش من صجك ! في حياتي ما فكّرت في هالمخلوق فما بالك إنه يطلع لي ونص الليل ! .
××
ديروا بالكم على أنفسكم يمعودين مو ناقصين أفلام رعب .
Hussain.M:
وعليكم السلام والرحمة ...
الله يحفظك ... ما من قصور لأن كلنا مقصرين .. مرات الواحد ما يلحق يمر على الكل :)
Yang صج بَطل :)))
الله يسلمك بس احنا الحين بالديرة الحبيبة ماكو خفافيش "طائرة" بس خفافيش إنسية ليل ونهار !!
:))
حافظك الرحمن
لووووووووووووووووووووووووووووووووووووووووووووووووووووووووووووووووووووووووول
وهم لووووووووووووووووووووووووول
سالفتكم تموت من الضحك وتعليقاتكم اكثر
ربي يخليكم حق بعض ويبلغكم بعيالكم يا رب
ذكرتيني بسالفه الخفافيش
اول ما سكنا لبنان كانت فيه خفافيش وضفادع.. وكنا لازم نبطل الدرايش لان ماكو وسيله تهويه
اختي تقول حق اخوي انا خايفه يقولها نامي وحطي يمج ثوم الشاورما عشان لا يقربون منج هههههههه
bent el deera:
الله يخليج ويحفظج لج كل غالي يا رب
أهم شي عجبتكم السالفة وغيرتوا جو
لوووووووووووووووووول
هذا أخوج كلش كلش ما يشوف أفلام مصاصي الدماء
لووول
الذكريات اللي مثل هذي لازم تتوثق للمستقبل
حياج الله يا بنت الديرة ومنورتنا بوجودج
:)))
تسلمين لي يا قلبي ومشكوره على هالترحيب الحلو :>
وصج ضحكت وقصيت على ابوي السالفه وشكله مطنشني لانه يشوف مباراه
وهذا اخوي سكتي عنه قصصه وسوالفه ماتخلص
كان معلمني اقول رد " تفضلي" .. زاد فضلج وعما بقلبج
وانا الغبيه كنت ارددها لي ثالثه او رابعه متوسط
مع العلم انه اصغر مني بسنتين
bent el deera:
الحلو وجودج وأخلاقج يا بنت الديرة
أبوج شكله قاعد يشوف مباراة ريال مدريد
لووول
أمبيه أخوج إسم الله عليه نزغة
لووول
قلت ليانغ على سالفة ردج ضحك .. زين بطلتيها
لوول
الله يحفظكم لبعض يا رب
وبيتج ومطرحج يا لزيزة
أخت عزيزة وغالية
:))
لووووووووووووووووووول والله قمت اضحك ضحك لين عيوني دمعت .. موتيني انا مع امي من الضحك
من يتوقع خفاش ابيته !!!
شكلج حرمتي اتبطلين الدريشه .. بلاجو بلا بطيخ سكري دريشتج اامنلج :)
fatto:
يا بختي تعليقين بيوم واحد
:))
يا رب ما يبعد عن مباسمكم الضحكة ويحفظ لكم الوالدة من كل شر
ضحكوا واستانسوا والله الواحد ما يصدق يسمع ولا يقرا شي يفرح هالأيام
يعل أيامكم كلها فرح وسعادة بالدنيا والآخرة
لا والله هم ظليت أفتح البلكونة قلت يعني جم خفاش بيضيع ويدش عندنا
!!
وحتى لو دش صرنا خبرة خلاص لوول
حياج الله إنتي والوالدة
:)
Post a Comment